Чым жыве Шчучынскі аддзел ГА «Саюз палякаў на Беларусі»

Аб неабходнасці пашыраць свае рады, зацікаўліваць і прыцягваць да грамадскай дзейнасці новых людзей, захоўваць этнічную культуру, вывучаць гісторыю і быць патрыётамі сваёй старонкі – пра ўсё гэта і многае іншае ішла размова на справаздачна-выбарнай канферэнцыі Шчучынскага аддзела ГА “Саюз палякаў на Беларусі”.

Слова трымаў старшыня арганізацыі В.І. Богдан, які на цудоўнай польскай мове прывітаў прысутных у канферэнц-зале Дома палякаў і распавёў гутарку пра тыя справы і творчыя дасягненні, што па праве выклікаюць гонар не толькі ў этнічнага супольніцтва, а ў кожнага неабыякавага жыхара нашай шматнацыянальнай Шчучыншчыны.

У Шчучынскім раёне больш за 200 чалавек у шасці ўстановах адукацыі вывучаюць на факультатывах і ў гуртках польскую мову. Сапраўдным асяродкам нацыянальнай культуры стаў народны хор польскай песні “Промень”, які ярка і творча прадстаўляе мастацтва нашага рэгіёна на шматлікіх міжнародных фестывалях і заўжды вяртаецца з высокімі ўзнагародамі. Аб гэтым расказаў сябра аддзела ГА “СПБ”, мастацкі кіраўнік хору А.А. Міцай.

Члены клуба “Лад” таксама заўсёды могуць разлічваць на плённае супрацоўніцтва і цёплы прыём у Доме палякаў, лічыць арганізатар і натхняльніца клуба М.І. Вінчэўская. А загадчыца дзіцячага садка №4 А.А. Федасеева пачула апладысменты, калі ў сваім выступленні некалькі разоў падкрэсліла: “Мы ўсе славяне, нават нашы мовы – польская і беларуская – роднасныя, мы паважаем гісторыю, культуру і традыцыі кожнага з народаў, што насяляюць нашу рэспубліку. Жыць у міры і згодзе, мацаваць сувязі з краінай-суседкай, дзе ў кожнага ёсць сваякі і сябры – вось наша мэта”.

Удзельнікі канферэнцыі абралі новае праўленне, рэвізійную камісію і старшыню раённага аддзела ГА “СПБ”, зноў аказаўшы высокі давер Віктару Іванавічу Богдану як свайму лідару.

25 сакавіка ў Мінску адбудзецца ІХ з’езд Саюза палякаў на Беларусі. Чатырох дэлегатаў вылучылі на гэты форум і шчучынцы.

Крыніца: Дзянніца