«Каменскае» і вялікі турыстычны патэнцыял
З ветлівай усмешкай і вясёлым агеньчыкам у вачах сустракае гасцей паляўніча-рыбалоўнай гаспадаркі “Каменскае” Шчучынскага завода “Аўтапровад” спецыяліст па турызме Анастасія Гладкая. Дзяўчына працуе тут усяго некалькі месяцаў, аднак ужо зарэкамендавала сябе як высокакваліфікаваны спецыяліст, працавіты і адказны работнік, добразычлівы і неабыякавы чалавек.
– Пасля заканчэння Беларускага дзяржаўнага тэхналагічнага ўніверсітэта я прыехала па размеркаванні ў Шчучын, – гаворыць Анастасія. – Горад падаўся мне вельмі чыстым і ўтульным. Кіраўніцтва завода забяспечыла жыллём: выдзеліла блок у заводскім інтэрнаце.
Мая суразмоўца прызналася, што спачатку планавала ўладкавацца на працу ў турфірму або лясгас, але пасля наведвання паляўніча-рыбалоўнай гаспадаркі “Каменскае” змяніла сваё рашэнне. Цяпер яна сустракае гасцей з розных куточкаў Беларусі і замежжа: праводзіць экскурсіі, займаецца арганізацыяй семінараў і канферэнцый, рознага роду ўрачыстасцей. Нягледзячы на такі напружаны графік, выдатна спраўляецца са сваімі абавязкамі.
– Мы аказваем вельмі шырокі спектр паслуг, – зазначае Анастасія. – Упэўнена, кожны зможа знайсці ў “Каменскім” занятак па душы. Мужчыны звычайна прыязджаюць сюды парыбачыць на белага амура, карпа, карася, фарэль. Каб улоў быў багатым, мы рэгулярна зарыбляем нашы вадаёмы. Аблюбавалі “Каменскае” і паляўнічыя: у блізляжачых лясах водзяцца лосі, казулі, лісы, зайцы, вавёркі. Жанчыны і дзеці любяць наведваць наш заапарк, з задавальненнем катаюцца на конях, арганізоўваюць велавандроўкі.
Сапраўды, паляўніча-рыбалоўная гаспадарка “Каменскае” карыстаецца вялікай папулярнасцю сярод турыстаў, асабліва жыхароў Гродзеншчыны. Аднак завітваюць сюды і госці з іншых куточкаў краіны і нават замежжа.
– Да нас прыязджала дэлегацыя з Кітая, – расказвае спецыяліст па турызме. – Гасцям з Паднябеснай вельмі спадабалася наша кухня, якая складаецца ў асноўным з беларускіх нацыянальных страў. Ад’язджаючы, замежныя турысты дзякавалі за цёплы прыём і абяцалі абавязкова прыехаць да нас яшчэ.
Дарэчы, большасць выхадных будучага лета ў “Каменскім” ужо “распісаны”. Дый узімку тут не заціхае жыццё.
– Мы актыўна прасоўваем наш прадукт на турыстычным рынку, – зазначае Анастасія. – У пошуках патэнцыяльных кліентаў выкарыстоўваем інтэрнэт. На нашым афіцыйным сайце www.kamenskoe.by можна знайсці ўсю неабходную інфармацыю, а таксама пачытаць свежыя публікацыі аб нашай гаспадарцы.
Каб павысіць узровень сэрвісу і набрацца каштоўнага вопыту, Анастасія Гладкая часта наведвае розныя форумы і выставы, якія ладзяцца ў Гродне, Мінску, Маскве.
– Турызм – вельмі важны напрамак эканомікі, які неабходна актыўна развіваць, – пераканана Анастасія. – Гэта дазволіць прыцягнуць дадатковыя сродкі ў раённы бюджэт. Шчучыншчына мае багатае гістарычнае мінулае. Тут захавалася шмат архітэктурных помнікаў, таму ёсць што паказаць гасцям! Калі мае сябры прыехалі ў Шчучын, яны былі вельмі ўражаны веліччу палаца Друцкіх-Любецкіх. Спадабалася ім і вежа з гадзіннікам на цэнтральнай плошчы, самалёт МІГ-25, усталяваны на ўездзе ў горад. Надоўга запомніцца і экскурсія па тэрыторыі аэрадрома. Але, на жаль, большасць людзей сёння аддае перавагу адпачынку на канапе, што няправільна. Трэба абавязкова вандраваць: пазнаючы свет, мы па новай пазнаем сябе.
Крыніца: Дзянніца
