Рэстаран «Шчучын» чакае наведвальнікаў!
Для работнікаў рэстарана кожны наведвальнік – важная персона
Наш Шчучын – гасцінны горад. Вось і яго “цёзка”-рэстаран са свайго боку таксама стараецца падтрымліваць гэты статус. Простае і блізкае душы “Сардэчна запрашаем!” пры ўваходзе не пакідае сумненняў: трэба зайсці.
Якраз час абеду. Людзей няшмат. Ёсць магчымасць разгледзецца. Утульная абстаноўка залы разнявольвае і супакойвае. Бела-малочны колер сцен надае прасторнаму памяшканню лёгкасць, дызайнерскія свяцільні – камфорт, а французскі посуд на сталах – стыльнасць.
Як вядома, усе гэтыя і іншыя змяненні ў інтэр’еры і сервіроўцы сталі дапаўненнем да сур’ёзнага рамонту, на які было выдаткавана 7,5 мільярда недэнамінаваных рублёў. Такі інвестыцыйны падарунак зрабіў “Белкаапсаюз” спажывецкай кааперацыі раёна напярэдадні свята беларускага пісьменства. Менавіта тады галоўны аб’ект грамадскага харчавання горада змяніў і назву: з далёкай зорнай “Вегі” на блізкі і родны “Шчучын”.
Але вернемся да мэты візіту. Афіцыянт Дзмітрый Бакун, прыняўшы заказ, спорна кіруе ў рэстараннае “закуліссе” – да кухні, праз хвіліну-другую вяртаецца з “духмянай” талеркай і віртуозна ставіць яе на стол. Такое абслугоўванне, трэба прызнаць, – лепшая прыправа да стравы. І, як даведалася, уласцівае ўсім работнікам рэстарана.
– Калектыў тут невялікі – 12 чалавек, але прафесіянальны і дружны. Работа арганізавана пазменна, – расказвае начальнік аддзела грамадскага харчавання Шчучынскага філіяла Гродзенскага аблспажыўтаварыства Ніна Сцяпанаўна Манчук. – Але незалежна ад таго, хто “на дзяжурстве”, узровень абслугоўвання ў рэстаране высокі. Тут ёсць каму паказваць клас. Шмат гадоў чаруюць на кухні вопытныя шэф-повары Данута Пятроўна Бабіцкая і Ірына Іосіфаўна Куцэйка. Кулінарным талентам надзелены і іх калегі Алена Леанідаўна Васілюк, Святлана Станіславаўна Несцер і Кацярына Мікалаеўна Кіслушка. Дастойна пахвалы праца афіцыянткі Людмілы Арыткінай. Любяць сваю работу і выдатна з ёй спраўляюцца бармены Наталля Рысюкевіч і Андрэй Волчак. Разнастаіць меню дапамагае малады тэхнолаг Дар’я Дымінская – спецыяліст з творчай стрункай, аўтар многіх страў-навінак. Усе гэтыя людзі надзвычай ветлівыя, добразычлівыя і абыходлівыя з кліентамі, якія пераступаюць парог аб’екта грамадскага харчавання. Для іх кожны наведвальнік – важная персона.
Сапраўды, у рэстаране стараюцца прыняць чалавека так, каб яму абавязкова захацелася сюды вярнуцца. А каб узнікла жаданне зайсці ўпершыню, імкнуцца зацікавіць рознымі кулінарнымі акцыямі, якія прадугледжваюць зніжкі на абедзенныя стравы (адна з іх плануецца да свята 8 Сакавіка), і “фішкамі” накшталт Дзён нацыянальных кухань.
І калі за абедзенны час наведвальнік, магчыма, і не паспее як след рассмакавацца і ацаніць поварскія шэдэўры, то патрапіўшы сюды на юбілей, вяселле ці іншую ўрачыстасць, будзе нахвальваць яшчэ доўга. Дарэчы, вялікая і банкетная залы разлічаны на 126 пасадачных месцаў.
Многія гараджане і госці Шчучына ўжо прызналі высокі ўзровень прафесіяналізму мясцовых рэстаратараў, культуру абслугоўвання і прагаласавалі за гэта рублём са сваіх кашалькоў. Так, у мінулым годзе рознічны тавараабарот рэстарана “Шчучын” склаў 205,6 тыс. рублёў. Гэта 228,7% у дзеючых цэнах і 206,8% у супастаўных.
Нядаўна прачытала: рэстаран – гэта як тэатр. Яго задача – уразіць, забавіць, нічым не выдаўшы, якія гарачыя працэсы адбываюцца за “кулісамі”. Стварыць такую камфортную атмасферу ўдаецца і прафесіяналам са “Шчучына”.
Крыніца: Дзянніца
