«Science Quiz» збірае сяброў
Такую назву абрала для сябе каманда эрудытаў са Шчучына і заняла другое месца ў маладзёжнай інтэлектуальнай гульні «Science Quiz», арганізатарам якой выступіў абласны камітэт ГА «БРСМ».
У той дзень у маладзёжным цэнтры «Гродна» сабраліся разумнікі і разумніцы з усяго Прынёманскага краю. Настаўнікі і эканамісты, медыкі і юрысты адказвалі на пытанні, прысвечаныя Году навукі.
Наша каманда — «GGWP» — гуляла пад нумарам 13, але гэта, здавалася б, містычная лічба не змагла перашкодзіць нашым інтэлектуалам заявіць пра сябе. Змагацца давялося з 21 камандай, што аб’ядналі прадстаўнікоў больш за 70 прадпрыемстваў. Нашы рабяты не разгубілі і нават трапілі ў аб’ектыў відэакамеры тэлеканала “Гродна Плюс”.
Гульня атрымалася яркай і дынамічнай: размінка і пяць тураў па сем пытанняў. Прымаць рашэнне даводзілася вокамгненна, аднак шчучынцы з гэтай задачай справіліся. Не дзіўна, за плячыма ў іх — не адна інтэлектуальная гульня і перамога.
Як аказалася, нашы эрудыты — Данііл Ступакевіч, Аляксей Макуш, Павел Войкель, Аляксандр Гарноўскі і Георгій Каравайскі — збіраюцца разам не толькі за гульнявым сталом. У звычайным жыцці яны — сапраўдныя сябры.
— У нас атрымліваецца працаваць у камандзе, — з гонарам адзначае капітан каманды Данііл Ступакевіч. — «GGWP» — гэта спецыяліст банка, матэматык, гісторык і працаўнікі завода «Аўтапровад». Моцныя бакі кожнага з ігракоў падказваюць куды рухацца пры пошуку адказу. Канечне, эрудыраванасць несумненна дапамагае, але здольнасць думаць лагічна і хутка, імгненна выкрэсліваць памылковыя варыянты, прыводзячы якасныя аргументы цэніцца значна больш. Мы лічым, што самае цікавае пытанне тое, якое можна «ўзяць» не толькі розумам, але і логікай.
Дарэчы, паказаць сваю эрудыраванасць і стаць абсалютнымі пераможцамі ў шчучынцаў яшчэ будзе шанц: абласны камітэт ГА «БРСМ» мае намер і далей праводзіць такія маладзёжныя інтэлектуальныя гульні.
Крыніца: Дзянніца
