Як шчучынцы святкавалі Масленіцу разам са Шчучынскім масласырзаводам

Да чаго ж весела і арыгінальна праходзіць у нашым горадзе свята «Масленіца са Шчучынскім масласырзаводам»!

Нездарма ж у народзе кажуць: як зіму правядзеш, так і год пражывеш. А сёння з самага ранку Шчучын абуджала беларуская народная музыка, хлопцы і дзяўчаты, як у старадаўнія часы, заклікалі масленічнай песняй. Зіма, нібы адчула, што менавіта сёння з ёй хочуць развітвацца, ды давай засыпаць горад снегам, палохаць завірухай. Але не на такіх натрапіла!

Да сцэны, устаноўленай на галоўнай плошчы райцэнтра, сабралася багата гараджан і гасцей Шчучына. Усім хацелася паўдзельнічаць у прыгожым свяце, сустрэцца са спадарыняй Масленіцай, развітацца з «бландзінкай» Зімой і прывітаць юную прыгажуню Вясну.

А якія асаблівыя бліны ў гэты дзень! Нібыта сонейка — залатыя і на дзіва смачныя! Адмыслова кулінарылі гаспадынькі на каларытных падворках «Жалудоцкага агракомплексу», ААТ «Васілішкі», «Шчучынаграпрадукт» і іншых. Гасцінна збіралі люд, здзіўлялі шчодрасцю ды майстэрствам. Фірменны шацёр ААТ «Шчучынскі масласырзавод» таксама выклікаў інтарэс у пакупнікоў — прыхільнікаў нашай мясцовай, экалагічнай і здаровай прадукцыі.

— Частуй, частуй, Масленка! — прыгаворвалі знаўцы народных абрадаў.

— Сапраўдны гастранамічны тур! — ухвальна ацэньвалі бывалыя турысты.

Азарту прыбаўлялі розыгрыш масленічнай латарэі і майстар-клас старадаўніх побытавых танцаў ад аматарскага калектыву «Дэмбраўская кадрыля».

Сапраўдныя страсці разгараліся ля «Ледзянога слупа», па якім смельчакі імкнуліся дабрацца да прыза, што спакушальна вісеў на самай верхавіне. Сярод пераможцаў — Уладзімір Карніенка, Дзмітрый Чайко, Валерый Працкайла і многія іншыя.

Прадэманстраваць удаласць маладзецкую можна было і ў імправізаваным «спартыўным гарадку», дзе хлопцы-асілкі даказалі, што не навічкі ў гіравым спорце. А самым трапным у дартсе аказаўся … старшыня Ляцкага сельвыканкама Павел Літавар.

Бадай, кульмінацыяй свята стала карнавальнае шэсце каралевы Зімы са світай, дзе кружылі  дзяўчынкі-Сняжынкі, віталі ўражаную публіку самавітыя Дзяды Маразы, іскрыліся ад прамяністых усмешак сімпатычныя Снягурачкі. Грамада прайшлася па цэнтральнай вуліцы Шчучына і рушыла да сцэны. Вось тут і адбылося спатканне Зімы і Вясны, якая выйшла на гэту хвалюючую сустрэчу ў суправаджэнні грацыёзных Вясняначак і вясновых Месяцаў  пад спевы птушак ды срэбры звон ручаёў.

Сапраўдны дыспут устроілі героі Масленіцы: «Якая з пор года больш вясёлая ды багатая на святы?» Вядома ж, кожны застаўся пры сваім меркаванні. А вось вяселле, песні і танцы былі агульнымі. Публіка падтрымлівала гэты гуллівы настрой, спявала і падтанцоўвала. Разам пайшлі паліць зімовае пудзіла, каб ўсё ліхое рассеялася з дымам, згарэла з агнём, каб вясна хутчэй ўступіла ў свае правы, а зямелька радзіла, ды шчодрым на ўраджаі выдаўся год.

— Мы прыехалі з Гродна да сваіх бацькоў у Ракавічы, а даведаўшыся, што ў Шчучыне Масленіца, вырашылі не прапусціць такое вясёлае свята, — гавораць Аляксей і Інга Сідаровічы, якія ўстроілі свайму маленькаму сыну Уладзіку сапраўдную вандроўку ў казку. Вакол столькі казачных герояў ды вясёлых роставых лялек! Не пашкадавалі гродзенцы, што выхадныя праводзяць у Шчучыне.

— А для мяне гэта свята — падстава сустрэцца са знаёмымі, абмяняцца добрымі словамі і … папрасіць прабачэння. Сёння ж незвычайны дзень, а Даравальная нядзеля, — дзеліцца ўражаннямі жыхарка Шчучына Ніна Сыч. — Так хораша, што адраджаюцца цудоўныя народныя традыцыі, што фальклорны матыў праходзіць праз усю канву сённяшніх масленічных забаў. Вялікі дзякуй арганізатарам гэтага прыгожага свята.

Нягледзячы на капрызы нябеснай канцылярыі, шчучынцы ззялі ўсмешкамі, вадзілі карагоды, віншавалі адзін аднаго, куплялі на памяць сувеніры ў народных майстроў, частаваліся мёдам з блінамі. Можна было падсілкавацца шашлыкамі, ацаніць народную кухню. А многія зрабілі сабе абноўкі, бо выязныя павільёны ад гродзенскага «Сілуэта», баранавіцкіх швейнікаў, іншых вытворцаў карысталіся вялікай папулярнасцю.

Некаторыя гараджане здымалі яркія сюжэты на відэа, фатаграфаваліся: прыгожых момантаў было багата. Асаблівую ноту ўнесла выступленне ансамбля з Мінска «Гуляй, казак!» Гэта сапраўднае шоу з песнямі і танцамі, народным гумарам і зухаватай маладзецкай ўдаласцю.  Нагадаем, што Масленіца праходзіла пры падтрымцы Шчучынскага масласырзавода. А тое, што свята ўдалося на славу, заслуга і спонсараў, і арганізатараў — аддзела ідэалагічнай работы, культуры і па справах моладзі райвыканкама.

Крыніца: Дзянніца